Sálfræðiþjónusta Háskóli Íslands tilheyrir undir Náms- og starfsráðgjöf Háskóla Íslands (NSHÍ) og er staðsett á 3. hæð Háskólatorgs.

Sálfræðiþjónustan er gjaldfrjáls fyrir alla nemendur skólans en miðað er við eitt til þrjú viðtöl á misseri. Í sálfræðiþjónustunni er veitt ráðgjöf og stuðningur í einstaklingsviðtölum. Þjónustan felur ekki í sér ADHD greiningu. Boðið er upp á að viðtölin fari fram á íslensku, ensku, dönsku eða þýsku. Auk einstaklingsviðtala eru reglulega haldin námskeið um hugræna atferlismeðferð (HAM), sjálfstyrkingu, prófkvíða og fleira.

Starfsfólk

Anna Guðrún Guðmundsdóttir, Camilla Ann Stacey, Hrafnkatla Agnarsdóttir og Rakel Davíðsdóttir sinna sálfræðiþjónustu við Háskóla Íslands.

Hvernig bóka ég tíma?

Hægt er að bóka tíma með því að senda tölvupóst á netfangið: salfraedingar@hi.is

Hvað kostar þjónustan?

Þjónustan er ókeypis fyrir alla nemendur Háskóla Íslands.

Sálfræðiráðgjöf háskólanema veitir háskólanemum og börnum þeirra sálfræðiþjónustu, einstaklingsmeðferð og hópmeðferð. Þjónustuna, sem starfrækt er á vegum Sálfræðideildar, veita meistaranemar í klínískri sálfræði við Háskóla Íslands undir handleiðslu sérfræðings í klínískri sálfræði.

Sálfræðiráðgjöfin er staðsett á jarðhæð í suðurenda Nýja Garðs, Sæmundargötu 12, 102 Reykjavík. Þar fer fram greining og meðferð við ýmiss konar sálrænum vanda. Unnið hefur verið með málefni einstaklinga, para, fjölskyldna og hópa.

Markmið starfseminnar er tvíþætt. Annars vegar að þjálfa framhaldsnema í sálfræði í klínískum störfum og hins vegar að veita sálfræðiþjónustu fyrir háskólanema og börn þeirra.

Dæmi um sálfræðiráðgjöf sem þjónustan veitir:

• að temja sér hjálplegt hugarfar og árangursríka hegðun.
• að ná námsmarkmiðum og öðrum mikilvægum markmiðum.
• að vinna að góðri geðheilsu og almennu heilbrigði.
• að eiga við tilfinningavanda, svo sem kvíða, þunglyndi, reiði eða skömm.
• að taka vel ígrundaðar og markvissar ákvarðanir.
• að þjálfa sig í ákveðni og byggja upp hátt óvissu- og mótlætisþol.
• að huga að eigin lífsstíl, endurskoða gildi sín og styrkja karakter sinn.
• að bæta félagsleg samskipti, efla persónutengsl og fjölskyldubönd.

Í Sálfræðiráðgjöfinni er stuðst við viðurkenndar kenningar um sálfræðimeðferð og gagnreyndar aðferðir. Þar er veitt skammtímameðferð en ekki langtímameðferð. Sem þjálfunarstöð fyrir sálfræðinema er starfseminni ekki ætlað að fást við alvarlegustu sálmein, svo sem langvinna geðsjúkdóma eða eiturlyfjafíkn, en leitast er við að veita aðstoð og vísa þeim málum til viðeigandi meðferðar.

Starfsfólk

Sálfræðinemarnir veita þjónustuna undir handleiðslu sérfræðinga í klínískri sálfræði.

Hvernig kemst ég að?

• Fullorðnir sækja um á öruggu svæði hér.
• Foreldrar sækja um fyrir börnin sín á öruggu svæði hér.

Hvað kostar þjónustan?

Skjólstæðingar greiða 1.500 kr. fyrir hvert sálfræðiviðtal, sem miðast við 60 mínútur, það er 50 mínútna viðtal og 10 mínútur fyrir undirbúning og dagnótuskrif.

Félagsráðgjöf háskólanema er gjaldfrjáls þjónusta þar sem nemendur í MA námi veita öðrum nemendum HÍ félagslega ráðgjöf. Sú þjónusta sem hægt er að nýta er til dæmis:

• Fjölskylduráðgjöf
• Fjármálaráðgjöf
• Ráðgjöf um réttindi
• Ráðgjöf vegna samþættingar náms og fjölskyldulífs
• Samskiptaráðgjöf
• Uppeldisleg ráðgjöf

Hægt er að sækja um þjónustuna með því að fylla út umsókn á hér

Einnig eru upplýsingar á instagram: nemendaradgjofhi

Bergið veitir einstaklingsmiðaða ráðgjöf og þjónustu til ungmenna til 25 ára aldurs.

Markmið Bergsins er að bjóða upp á lágþröskuldaþjónustu með áherslu á stuðning, fræðslu og ráðgjöf.

Í Berginu er lagt upp með að skapa notalegt og öruggt umhverfi fyrir ungt fólk sem vill fá aðstoð fagfólks.

Hægt er að hafa samband í síma 571-5580 eða á bergid@bergid.is

Bráða- og ráðgjafarþjónusta geðsviðs Landspítalans

Píeta samtökin

Hjálparsíminn 1717 og netspjallið – Rauði krossinn á Íslandi

Neyðarlínan – 112

Heilsugæslan á höfuðborgarsvæðinu